Gjokaj, Dukaj dhe Lulanaj takim me Rektorin e Universitetit të Prishtinës

Rektori i Universitetit të Prishtinës “Hasan Prishtina”, prof. dr. Marjan Dema, ka pritur në zyrën e tij përfaqësues nga Qeveria e Malit të Zi, gjegjësisht zëvendësministrin në Ministrinë për të Drejtat e Njeriut dhe të Pakicave, z. Leon Gjokaj, zëvendësministrin e pakicave në Ministrinë e Arsimit, z. Marash Dukajn si dhe Fikret Lulajanaj – këshilltar në Ministrinë e Pakicave.

Rektori Dema në takim ishte i shoqëruar nga prorektori për kërkime shkencore në Universitetin e Prishtinës, prof. dr. Faton Berisha.

Dema në këtë takim premtoi mbështetjen maksimale për kandidatët për studentë që vijnë nga këto vise shqipfolëse, të cilët kanë shprehur vullnetin e tyre për të qenë pjesë e Universitetit të Prishtinës “Hasan Prishtina”. Ai premtoi që do të jetë i gatshëm të shtyjë tutje çfarëdo marrëveshje në të mirë të këtyre studentëve që do të jenë pjesë e UP-së dhe atyre që aktualisht janë të tillë.

Në anën tjetër, Gjokaj diskutoi për shumë aspekte me anë të të cilave do mund të krijoheshin lehtësira për studentët nga Mali i Zi dhe Lugina e Preshevës, të cilët vendosin të kryejnë studimet në UP. “Për vite me radhë, Universiteti i Prishtinës ka qenë vatër për përgatitjen e studentëve që vijnë nga Mali i Zi” theksoi Gjokaj ndër të tjerash.

Pra, në këtë takim, të dyja palët diskutuan për mënyrat e ndryshme se si mund të krijohen lehtësira për këta studentë, si dhe mënyra të tjera të bashkëpunimit në të mirë të studentëve, rrjedhimisht edhe familjeve shqipfolëse nga këto vise.