Erdogan takohet me Papën në Vatikan

Presidenti turk Rexhep Tajip Erdogan u takua sot me Papa Françeskun në Vatikan për bisedime që pritej të përqendroheshin te statusi i Jerusalemit dhe lufta kundër terrorizmit.

Erdogan është presidenti i parë turk që viziton Vatikanin në 59 vjet. Papa u takua me të gjatë vizitës që bëri në Stamboll në vitin 2014.

Në prag të nisjes për në Vatikan, Presidenti Erdogan tha se Shtetet e Bashkuara janë “të vetme” në vendimin e tyre për të njohur Jerusalemin si kryeqytetin e Izraelit.

Zoti Erdogan dhe Papa Françesku kanë shprehur shqetësim ndaj këtij vendimi, që shumë aleatë të SHBA thonë se mund të çojë në dështimin e përpjekjeve për paqen në Lindjen e Mesme.

Në takim, presidenti i Turqisë dhe papa kanë theksuar edhe nevojën për ruajtjen e statusit të Kudsit, ashtu siç përcaktohet në rezolutat e OKB-së dhe të drejtën ndërkombëtare.

Erdogan ka falënderuar papën për mesazhet e tij në lidhje me Kudsin, ndërkohë që edhe papa ka shprehur vlerësime pozitive për përpjekjet e presidentit Erdoğan në lidhje me Kudsin dhe ndihmat e dedikuara për refugjatët.

Erdogan gjithashtu e ka informuar papën në lidhje me operacionet kundërterroriste të Turqisë në Siri.

Ndërkohë në Romë forcat e rendit u përplasën me kurdët dhe mbështetësit e tyre që kishin organizuar një demonstratë të paautorizuar kundër vizitës së Presidentit turk.

Rreth 3500 forca të policisë ishin mobilizuar në Romë dhe autoritetet kishin shpallur një zonë të ndaluar për demonstruesit pranë Vatikanit, hotelit të zotit Erdogani dhe ndërtesat ku ai do të takohej presidentin dhe kryeministrin e Italisë.

Shperndaje
error: Të drejtat e rezervuara !!