ALBDreams/ Dritare e hapur për të gjithë shqiptarët

Shkruan, Gjokë DUKAJ

Malësi e Madhe

Fjala e lirë, mendimi dhe  qëndrimi i shprehur lirisht, janë njëra ndër të arriturat e  arta  të  civilizimit njerëzorë, andaj të rreshtohesh krahë kësaj të arritura është shërbim i madh për kombin të cilit i shërben. Ekzistimi i portalit ALBDreams, puna dhe sakrifica e gjatë në shërbim të fjalës së lirë, në shërbim të komunitetit shqiptarë kudo në botë, është një dhuratë e çmuar  nga  themeluesi, z. Rush Dragu, bashkëkombësit tonë i cili jeton dhe punon në mërgim.

Vite më parë, u njoha me disa nga shkrimet e postuara  nga emra të njohur të publicistikës dhe të letrave në shqip e për të cilët kisha lexuar dhe dëgjuar nga media tjera por që ata, nuk kishin hezituar të prezantohen qoftë edhe me një pjesë  të punës së vet  në  ALBDreams, duke parashtruar çështje nga më të ndryshmet nga hapësira mbarë-shqiptare  si dhe radhët e bashkëkombësve tonë që jetojnë në mërgim. Gatishmëria e stafit drejtues  që të jenë të hapur për mendime dhe qëndrime të ndryshme  ishte e pëlqyeshme, sidomos, për  njerëzit e medias të cilët, duke shfrytëzuar këtë mundësi, ishin gjithnjë e më aktiv në përditësimin e temave dhe shkrimeve të ndryshme, në interesin më të gjerë të bashkëkombësve kudo.

Si rrjedhojë e gjithë kësaj, sot, ALBDreams, është dritare e hapur për emra të spikatur të cilët përmes veprimtarisë së vetë publike, jo vetëm që pasurojnë arkivin e këtij portali, por kanë mundësuar lëvizjen e informacioneve në kohë reale për lexuesit gjithnjë e më shumë të ALBDreams. Ajo që  duhet veçuar e që ndoshta e dallon ALBDreams nga shumë media tjera, sidomos lokale, është dhënia e hapësirës pa rezervë të gjithë të arriturave dhe vlerave të çfarëdo natyre qofshin ato, pavarësisht simpatisë ose jo, ndaj individëve pjesëtarë të komunitetit shqiptarë, ngado që vijnë ata. Për fat të keq, jo rrallë jemi dëshmitarë kur ndonjëri nga  media që pretendojnë se kanë kapur “maja të larta”, i  trajton krijues, ngjarje apo dukuri, varësisht  nga simpatia ndaj tyre e jo të njoftojnë për të arriturat dhe vlerat e  krijuara. Pikërisht, kjo ishte edhe nga arsyet kryesore që, sidomos, shumë emra të rinj janë paraqitur me shkrimet e veta në ALBDreams. Në këtë përvjetor të rëndësishëm , duke përgëzuar stafin drejtues, uroj që mediat e këtilla të vazhdojnë misionin e vet të shenjtë në funksion të informimit , si kronistë i denjë i kohës, duke u dhënë përjetësinë individëve, ngjarjeve dhe fenomeneve të kohës. I nderuar themelues, bashkëvëllai ynë  z. R. Dragu, familjarisht, Ju jemi mirënjohës për hapësirën e dhënë shkrimeve, punës dhe veprimtarisë sonë ç’gjë do të vazhdojmë edhe në të ardhmen.

Shperndaje