Mustafa: Demarkacioni kusht për themelimin e Ushtrisë – AAK mashtrim

Kryeministri i Kosoves Isa Mustafa ka thënë se demarkacioni me Malin e Zi është interes shtetëror dhe në interes të shtetit, prandaj, sipas tij, duhet ikur nga kauzat partiak dhe vetanake.

Ai kundërshtimin e opozitës për demarkacionin e ka quajtur kauzë të sajuar.

“Ne nuk e japim asnjë metër katror të Kosovës për asnjë çmim, as për viza as për asgjë. Jam i bindur se komisioni e ka bërë punën e vet mirë dhe nuk ka dyshime. Po të kishte bërë punën keq atëherë secili duhet ta dijë se kjo ka pasoja penale, pra është krim dhe dikush duhet të përgjigjet për atë vepër”, ka thënë Mustafa për rtk.

Kryeministri për herë të parë e ka përmendur demarkacionin si kusht për themelimin e Ushtrisë së Kosovës.

Ai ka thënë se Shtetet e Bashkuara të Amerikës dhe BE-ja nuk dëshirojnë të themelojnë ushtri në një vend që ka probleme kufitare me një shtet fqinjë.

AAK: Demarkacioni si kusht për ushtrinë, mashtrim

Departamenti për Politika të Mbrojtjes dhe të Sigurisë DPMS i AAK –së, kërkon nga Qeveria e Kosovës “që të mos i ndërlidhë situatat e dështuara të saj në mes të FAK-ut, ASK dhe Demarkacionit, si gjoja kusht që të këto tri çështje të ndërlidhen mese veti”.

Sipas AAK-së, Qeveria nuk duhet të fshehë dështimet e saj, por duhet t’i ndalë mashtrimet ndaj qytetarëve të Kosovës dhe Kuvendi duhet menjëherë ta themelojë Ushtrinë e Kosovës, para sesionit vjeshtor, e jo të përfillë apetitet dhe kushtëzimet e Listës Serbe për FAK-un.

“FAK-u, Ushtria e Kosovës si çështje obligim kushtetues e politik i kësaj qeverie, e cila është dashtë të bëhet menjëherë pas formimit të panatyrshëm të saj! Pra që në muajin e parë qeverisës dhe jo të krijohet ky vakum kohorë dhe politik, duke iu krijuar hapësirë si brenda e po ashtu edhe jashtë ndikimit të Serbisë dhe faktorëve të tjerë destruktivë, në këtë rast edhe të manipulohet opinion publik se gjoja Demarkacioni me Malin e Zi, është kusht për FAK –un. Talljet e tilla nga kryeministri janë të papranueshme dhe jo që nuk ndikojnë në krijimin e FAK-ut, por shpërfaqjet e tilla, janë në dëm të së ardhmes së Ushtrisë së Kosovës”.

“Qeveria dhe Kryeministri, i cili nuk po arrin akoma procedimin në Kuvend të amandamentimit të ligjit për FAK-un, njëherit dëshmoi se nuk arriti të realizojë detyrimin kushtetues për krijimin e Ushtrisë së Kosovës, duhet dhënë llogari për dështimet e njëpasnjëshme në dëm të Kosovës. Ne, si Departament për Politika të Mbrojtjes dhe të Sigurisë, i AAK–së, kërkojmë me ngulm, që FAK-u, përkatësisht Ushtria e Kosovës të konsiderohet prioritet strategjik, i ndarë nga çdo përpjekje për ta manipuluar apo kamufluar me situata të tjera dhe si prioritet strategjik nacional për Kosovën, të realizohet përpara çdo lloj nisme në Kuvend dhe menjëherë të veprohet në themelimin e tij”, thuhet në komunikatën e AAK-së. /

Shperndaje
error: Të drejtat e rezervuara !!