Ujkaj dorëhiqet nga LDnëMZ – Ftesë për bashkimin e shqiptarëve në një listë

Të nderuar Malësorë, dashamirë të Malësisë,

Në këtë moment historik për vendlindjen tonë, Malësinë, ku koha nuk pret dhe duhet të veprohet me dijeni dhe guxim, unë si aktor politik i 2 zgjedhjeve të fundit, si këshilltar i përbërjes së fundit të Kuvendit të Komunës Urbane të Tuzit, jap DORËHEQJE nga subjekti politik ku u kyça që në moshen 20 vjeçare (viti 2010)!

Për të mos dashur të thelloj perçarjet më tepër brenda strukturave Shqiptare që veprojnë në Malësi, e as të zgjoj polemika të reja, unë dua t’ua bëj të ditura vetëm 2 nga arsyet kyçe të këtij vendimi personal:

1. Mosrespektimi i premtimeve brendapartiake dhe defaktorizimi im, si aktor politik brenda grupit (subjektit në formim e sipër, LDSH-së), ku vendimet merren nga një individ, dhe çdo këshillim i një të riu është i tepërt. Ku grupet punuese dhe organet vendimmarrëse janë të paracaktuara, në menyrë që të realizohen planet e individit, e asnjëherë të grupit, e le më interesin e Malësisë.
2. Arsyeja e dytë dhe kyçe është, liria e shprehjes dhe e ndikimit në unifikimin e partive politike shqiptare, me njerëz të paprekur nga lloqi politik, pazaret e hapura, si dhe ato të fshehura në dëm të Malësisë. Ju paralajmëroj, se as unë, e asnjë i ri, asnjë dashamirë i vendit nuk e duam scenarion e Ulqinit, e as nuk duam të mbesim opozitë!

Prandaj, porosia ime perfundimtare është, ose bashkim i partive nacionale Shqiptare në Malësi, të bazuar në realizimin e çeshtjeve parimore, si dhe në realizimin e planeve ekonomike, të investimit në vendin ku jetojmë, sigurimit të punës të kuadrove tona etj…, ose vazhdim i agonisë shekullore, dhe bërja Zot shtëpie e një pakice Boshnjake në vendlindjen tonë.

-Ju, çfarë zgjedhni?!

Duke përkrahur thirrjen që z. Anton Lulgjuraj e bëri 2 ditë më parë për bashkim, dhe formimin e një liste të vetme Shqiptare dykonfesionale në Malësi, me të rinjët e inkuadruar në politikë dhe intelektualët e rinj që Malësinë e kanë para së gjithash, dhe nuk kanë konto të hapura as me njëri tjetrin, e aq më pak borxhe ndaj pushtetit aktual, edhe unë bëj thirrje që të dalim me një listë unike, të reformuar! Kjo, si menyrë e vetme e marrjes së pushtetit në komunën e re në kuadër të Kryeqytetit!

Pas distancimit tim nga subjekti, ku deri më sot bëja pjesë, unë si individ nuk i mbylli dyert e bashkëpunimit të mëtejshëm me kolegët e deritanishëm, perkundër mendoj se në këtë situatë mund të jap kontribut më të madh për vendin si individ i pavarur politikisht!

-Unë jam gati të bëj sakrifica për të ardhmen e Malësisë, po ju të dashur kolegë?!

Me respekt,
Prëla Ujkaj

Shperndaje
error: Të drejtat e rezervuara !!